Cefndir

Yn 2025, bydd Uchelgais Gogledd Cymru yn lansio eu Cronfa Ynni Glân Gogledd Cymru. Bydd hyn yn cynnig cyllid ar gyfer prosiectau cyfalaf sy’n berthnasol i ddatrysiadau ynni lleol glân a phrosiectau datgarboneiddio ehangach yn y sector gwirfoddol a phreifat ledled Gogledd Cymru. Bydd hefyd yn ategu cyllid cyfalaf sydd ar gael ar hyn o bryd drwy Gronfa Adfywio Cymru Banc Busnes Prydain a Chynllun Benthyciad Gwyrdd Busnes Banc Datblygu Cymru, ymhlith eraill. 

Wrth baratoi ar gyfer hyn, mae cyfres o ddogfennau wedi’u datblygu i ddarparu gwybodaeth am ddatblygu prosiectau yn gyffredinol a sut i ysgrifennu cynnig neu gais am grant. Nod y dogfennau hyn yw  cynorthwyo sefydliadau i ddatblygu prosiectau a chynigion cryfach a mwy cydlynol. Dyluniwyd y wybodaeth a gyflwynir i ddarparu canllaw ac awgrymiadau cyffredinol ar sut i ddatblygu cynigion prosiect a cheisiadau grant cadarn a chymhellol a gellir ei defnyddio mewn ystod o wahanol gyfleoedd cyllid. 

Gwybodaeth 

Bwriad y canllaw hwn yw eich helpu gydag awgrymiadau a syniadau ar gyfer llunio cynnig neu gais gwych am  grant. Er ein bod wedi gwneud ein gorau i’w wneud mor ddefnyddiol a hawdd â phosibl i'w ddilyn, mae rhai pethau y dylech eu cadw mewn cof: 

Canllaw cyffredinol yw hwn i’ch helpu i strwythuro a gwella eich cais neu gais am grant. Nid yw'n cwmpasu pob rheol neu fanylyn penodol, felly gwnewch yn siŵr eich bod bob amser yn gwirio'r gofynion swyddogol a'r cyfarwyddiadau ar gyfer y cyfle rydych chi'n gwneud cais amdano. 

Eich cyfrifoldeb chi yw gwneud yn siŵr bod eich cyflwyniad yn ticio’r holl flychau cyfreithiol, ariannol, moesegol. Gallai hyn olygu dilyn rheolau neu reoliadau penodol. Os nad ydych yn siŵr, mae’n syniad da gofyn am gyngor gweithiwr proffesiynol neu arbenigwr cyfreithiol. 

Enghreifftiau yn unig yw’r awgrymiadau cyllidebu yma, a bydd angen i chi eu haddasu i gyd-fynd â’ch sefyllfa. Cymerwch amser i gyfrifo'r holl gostau - rhai amlwg a phethau ychwanegol cudd. Os yn bosibl, mynnwch fewnbwn gan rywun sydd â phrofiad o gynllunio ariannol i wneud yn siŵr bod eich niferoedd yn adio i fyny. 

Nod y canllaw hwn yw sbarduno syniadau a chreadigrwydd. Ond cofiwch, y syniadau gorau yw’r rhai sy’n cyd-fynd â’r hyn y mae’r cleient neu’r corff cyllido yn chwilio amdano a dylech bwysleisio eich cryfderau. Dylech ganolbwyntio ar eu blaenoriaethau hwy a’ch galluoedd chi. 

Bwriedir i’r canllaw hwn eich ysbrydoli a darparu gwybodaeth i chi yn unig, ac er ein bod wedi ceisio cynnwys yr holl faterion hanfodol, ni allwn addo canlyniadau penodol. Mae’r hyn sy’n digwydd gyda’ch cynnig yn eich dwylo chi yn y pen draw, felly dylech ddarllen bopeth ddwywaith a chymryd cyfrifoldeb llawn dros y cyflwyniad terfynol. 

Gall proses gadarn wneud gwahaniaeth mawr. Dylech bennu rolau, amserlenni a chamau clir ar gyfer adolygu eich gwaith. Mae ymdrech tîm trefnus fel arfer yn arwain at gynigion cryfach, mwy caboledig. 

Awgrymiadau ar gyfer Canolbwyntio ar y Dasg:

  • Darllenwch y dogfennau cynnig neu grant yn drylwyr er mwyn i chi wybod yn union beth sydd ei angen. 

  • Cynlluniwch eich amserlen mewn ffordd realistig a gwneud yn siŵr bod gennych ddigon o adnoddau. 

  • Gofynnwch am adborth eich tîm neu randdeiliaid – efallai y bydd ganddynt syniadau gwych nad ydych wedi meddwl amdanynt. 

  • Dylech brawf-ddarllen popeth a gwneud yn siŵr ei fod yn cyflawni’r gofynion cyn i chi ei gyflwyno. 

Bydd defnyddio’r canllaw hwn ochr yn ochr â’ch arbenigedd chi yn eich helpu i greu cynnig neu gais cadarn. Pob lwc! 

Crynodebau o’r 4 dogfen: 

  1. Amlinelliad o’r Prosiect a’i Ymarferoldeb – dyma gam cyntaf y gwaith o ddatblygu eich syniad ar gyfer prosiect. Mae’r ddogfen hon yn ymwneud â phrofi dichonoldeb eich prosiect a datblygu amlinelliad o’r hyn yr ydych yn gobeithio ei wneud a sut.

  2. Datblygu Cais am Gyllid – unwaith y byddwch wedi cwblhau eich prawf dichonoldeb a chael amlinelliad o'ch prosiect efallai y byddwch yn ystyried gwneud cais am gyllid i symud y prosiect i'r cam nesaf. Mae'r ddogfen hon yn canolbwyntio ar ba wybodaeth y gallech fod am ei chynnwys mewn cais am arian a pham. Cofiwch deilwra unrhyw gyflwyniadau i ofynion y cyllidwr serch hynny!

  3. Geirfa a Chwestiynau Cyffredin – weithiau gall y derminoleg fod yn eithaf technegol, felly bydd y rhestr geirfa hon o gymorth i chi, yn ogystal â’r Cwestiynau Cyffredin a’r awgrymiadau da!

  4. Catalog Cymorth – weithiau mae’n syniad da gofyn am gymorth allanol, felly mae’r catalog hwn yn darparu ciplun o rai o’r grwpiau y gallwch gysylltu â hwy i gael cymorth ychwanegol pwrpasol. 

Comisiynwyd M-SParc i ddatblygu'r wybodaeth ysgrifennu cais hwn mewn cydweithrediad ag Uchelgais Gogledd Cymru. Mae’r hawlfraint yn parhau i fod yn eiddo i Uchelgais Gogledd Cymru yn unig, ac ni cheir atgynhyrchu unrhyw ran o’r ddogfen hon heb ganiatâd ysgrifenedig penodol Uchelgais Gogledd Cymru. Mae Uchelgais Gogledd Cymru yn estyn ei ddiolchgarwch i M-SParc am eu hymdrechion cydweithredol a'u cefnogaeth werthfawr wrth ddatblygu'r pecyn gwybodaeth ysgrifennu ceisiadau a'r dogfennau ategol. Gallwch gael rhagor o wybodaeth am M-SParc yma.

Gweithio mewn cydweithrediad ag awdurdodau lleol Gogledd Cymru.

Ariennir y prosiect hwn gan Lywodraeth y DU drwy Gronfa Ffyniant Gyffredin y DU, mae'r prosiect hwn yn cael ei gyflawni yn siroedd Conwy, Sir Ddinbych, Sir y Fflint, Gwynedd, Wrecsam ac Ynys Môn.