Mae Parc Gwyliau Spring Gardens yng ngogledd Cymru wedi adeiladu enw da am greu gofod croesawgar, cymunedol i berchnogion ymlacio a gorffwys ynddo. Gyda chefnogaeth Cronfa Ynni Glân Gogledd Cymru – sy’n rhan o Gynllun Twf Gogledd Cymru a redir gan Uchelgais Gogledd Cymru – mae'r busnes bellach yn cymryd camau ymarferol i sicrhau ei ddyfodol ynni drwy leihau costau a buddsoddi mewn ffordd fwy cynaliadwy o weithredu.
Wedi'i leoli ger Llanelwy, mae Parc Gwyliau Spring Gardens yn cynnig lleoliad heddychlon i berchnogion carafanau statig a chabanau gwyliau.
Yn eiddo i Gwyn a Haf Williams a'u hŵyr, Tom Williams, mae'r parc wedi'i drawsnewid o safle teithiol adfeiliedig i gymuned wyliau ffyniannus 72 llain, gyda phwyslais cryf ar gysylltiad a rhannu profiad.
O gynnal digwyddiadau rheolaidd i berchnogion i gadw tŷ clwb croesawgar, mae'r parc wedi'i gynllunio i gynnig y teimlad o gartref oddi cartref.
Mynd i'r afael â'r her o gostau ynni cynyddol
Fel llawer o fusnesau, mae Parc Gwyliau Spring Gardens wedi wynebu pwysau cynyddol oherwydd costau ynni uwch.
Gyda chyfleusterau i'w rhedeg ac ymrwymiad i gynnal profiad o ansawdd uchel i berchnogion, roedd dod o hyd i ateb cynaliadwy a chost-effeithiol yn flaenoriaeth.
Ar yr un pryd, roedd cyfle clir i fabwysiadu agwedd fwy rhagweithiol at ynni, gan wella effeithlonrwydd wrth leihau effaith amgylcheddol.
Dywedodd y Rheolwr Gyfarwyddwr, Tom Williams: "Mae costau ynni wedi dod yn bryder gwirioneddol i fusnesau fel ein un ni. Roedden ni eisiau chwilio am ffordd i gymryd rhywfaint o reolaeth yn ôl a gwneud y parc yn fwy cynaliadwy ar gyfer yr hirdymor."
Dod o hyd i'r gefnogaeth gywir
I ystyried y dewisiadau posib, aeth y perchnogion at UMi trwy ei wasanaeth cyllid masnachol sy’n cael ei ddarparu ar ran Uchelgais Gogledd Cymru, ac wedi'i gynllunio i gefnogi busnesau i fuddsoddi mewn ynni glân a lleihau allyriadau carbon.
Ar gyfer Spring Gardens, roedd y penderfyniad i weithio gydag UMi yn ymwneud â’r profiad ei hun, nid dim ond y cyllid.
"Roedd y tîm yn hawdd i gysylltu â hwy, yn rhagweithiol, ac yn cymryd amser i ddeall yr hyn yr oedden ni’n trio ei gyflawni." eglura Tom. "Wrth gwrs, roedden ni eisiau’r cyllid, ond fe wnaethon ni ddewis UMi a'r Gronfa Ynni Glân oherwydd y gefnogaeth a roddwyd i ni trwy gydol y broses."
Troi cynlluniau'n weithredu ymarferol
Gyda chefnogaeth UMi, sicrhaodd Parc Gwyliau Spring Gardens gyllid masnachol i fuddsoddi mewn system ynni solar.
Roedd hyn yn cynnwys gosod dros 100 o baneli solar ar do tŷ clwb y parc, a fydd yn darparu arbediad carbon blynyddol o 10,607kg CO2.
Trwy gydol y broses, darparodd UMi arweiniad a chefnogaeth, gan helpu'r tîm i fynd trwy’r broses ymgeisio a chyflawni'n hyderus.
Yn ôl Tom: "Roedd cael y gefnogaeth honno'n gwneud gwahaniaeth mawr. Fe wnaeth ein helpu i symud ymlaen efo rhywbeth a allai fod wedi bod yn eitha’ cymhleth fel arall."
Lleihau costau ac adeiladu gwytnwch
Mae'r gosodiad eisoes yn helpu Parc Gwyliau Spring Gardens i:
-
Leihau ei ddibyniaeth ar ffynonellau ynni allanol
-
Gwella ei ddiogelwch ynni
-
Gostwng costau gweithredu yn yr hirdymor
-
Lleihau ei allyriadau carbon
Arwain drwy esiampl
I Tom, mae'r prosiect hefyd yn gyfle i ddangos yr hyn sy'n bosibl. Mae'n gobeithio y bydd eu profiad yn annog busnesau eraill i feddwl yn wahanol am sut maen nhw'n rheoli ynni.
Trwy fanteisio ar gyllid i fuddsoddi mewn ynni glân, mae Parc Gwyliau Spring Gardens yn dangos sut y gall busnesau o bob maint gymryd camau ystyrlon tuag at gynaliadwyedd.
Dywed Tom: "Os ydi o’n gweithio i ni, mi all weithio i eraill hefyd. Weithiau mae o’n ymwneud â gwybod be’ sydd ar gael a chael yr hyder i wneud y cam cyntaf 'na. Wrth gwrs, mae'n fuddsoddiad a fydd yn talu ar ei ganfed yn yr hirdymor, ond mae o hefyd wedi gwneud gwahaniaeth ar unwaith i ni wrth ostwng ein biliau. Ryden ni’n gallu defnyddio'r arbedion i dalu arian yn ôl ar y benthyciadau ar gyfer y paneli."
Ydych chi'n meddwl buddsoddi mewn ynni glân?
Os ydych chi'n fusnes yng ngogledd Cymru sy'n ystyried sut i leihau eich costau ynni a gweithredu’n fwy cynaliadwy, cysylltwch â UMi am sgwrs am eich amcanion.